Prishtina 01 e ka nisur me fitore të thellë fazën grupore të “Main Round” në Ligën e Kampionëve, në futbollin e sallës. Kampionia e Kosovës dhe dy herë fituesja e Kupës së Kosvës në futsall, të mërkurën mposhti skuadrën finlandeze Kampuksen Dynamo me rezultatin 6:0. Ndeshja i ka takuar Grupit 7 të raundit kryesor të “Championsit”, dhe kryeqytetasit e kanë nisur mbarë kualifikimin për në “Elite Round”.
Serinë e golave në këtë ballafaqim e hapi Halim Selmanaj, ndërsa tjetër gol në pjesën e parë realizoi edhe Ylli Mazreku.
Prishtina 01 e drejtuar nga trajneri Haki Ahmeti ishte e pandalshme edhe në pjesën e dytë duke realizuar edhe katër herë të tjera. Portieri Juha-Matti Savolainen realizoi autogol për 3:0, ndërsa realizuan edhe Fitim Krasniqi dhe Mazreku më një tjetër gol.
Shënoi edhe Ramadan Alaj nëntë minuta para fundit. Ndeshjet po zhvillohen në Lituani që është nikoqir i Grupit 7.
Pikërisht ndaj skuadrës lituaneze, Kauno Zhalgiris, Prishtina 01 e zhvillon ndeshjen e dytë. Kauno Zhalgiris llogaritet favorit i grupit, në të cilin është edhe AEL-i i Qipros. Ballafaqimi Kauno Zhalgiris – Prishtina 01, zhvillohet të enjten në orën 18:00. Ndeshjen e fundit të kësaj faze grupore, Prishtina 01 e zhvillon më 28 tetor kundër AEL-it qipriot. Vetëm fituesi i grupit kalon në “Elite Round”.
