Ka nisur seanca e jashtëzakonshme e Kuvendit të Kosovës, e thirrur nga Grupi Parlamentar i Lëvizjes Vetëvendosje, për zgjedhjen e Presidentit të vendit.
Kryeparlamentarja dhe ushtruesja e detyrës së Presidentes, Albulena Haxhiu, përmes një njoftimi në Facebook, Haxhiu ka bërë të ditur se për postin e presidentes janë propozuar dy kandidate: Feride Rushiti dhe Hatixhe Hoxha.
Feride Rushiti është drejtoreshë e Qendrës Kosovare për Rehabilitimin e të Mbijetuarave të Torturës (QKRMT). Ajo dhe QKRMT janë nominuar më herët edhe për Çmimin Nobel për Paqe 2025, në vlerësim të punës së tyre në mbështetje të të mbijetuarve të dhunës.
Ndërkohë, Hatixhe Hoxha është doktorante në Fakultetin e Filologjisë në Universitetin e Prishtinës dhe pjesë e Lëvizja Vetëvendosje që nga viti 2010. Ajo ka shërbyer gjithashtu dy mandate si deputete në Kuvendin e Kosovës.
Në thirrjen e saj, Haxhiu u ka bërë apel të gjithë deputetëve që të marrin pjesë në seancë, duke theksuar se pjesëmarrja është obligim kushtetues në procesin e zgjedhjes së kreut të shtetit.
“Sot kam pranuar kërkesën e Grupit Parlamentar të Lëvizjes VETËVENDOSJE! për thirrjen e një seance të jashtëzakonshme për zgjedhjen e Presidentit, e cila do të mbahet sot në orën 20:30. Në kuadër të kësaj kërkese janë propozuar dy kandidatura për President: Feride Rushiti dhe Hatixhe Hoxha. I ftoj që të gjithë deputetët e Kuvendit të Republikës së Kosovës që të marrin pjesë në këtë seancë, në përputhje me obligimet e tyre kushtetuese”, ka shkruar ajo.
Ndryshe, seanca e sotme, paraprake e Kuvendit të Kosovës dështoi pas mungesës së tri partive opozitare në sallë.
Me këtë rast, LVV tërhoqi dy kandidaturat e mëparshme për president: Glauk Konjufcën e Fatmire Mulhaxha – Kollçakun.
