Ka rinisur seanca e Kuvendit të Kosovës për zgjedhjen e presidentit, ndërsa kanë mbetur edhe rreth një orë deri në përfundimin e afatit kushtetues.
Nëse nuk arrihet zgjedhja e kreut të shtetit brenda këtij afati, vendi pritet të shkojë në zgjedhje të reja.
Lëvizja Vetëvendosje i ka kërkuar Lidhjes Demokratike të Kosovës (LDK) 15 nënshkrime për kandidatin e saj për president, duke e ftuar që të dalë me kundërkandidat ndaj Feride Rushitit.
Megjithatë, LDK-ja ka deklaruar se kjo kërkesë synon vetëm sigurimin e kuorumit, pa ofruar mbështetje reale për kandidatin e tyre.
Mungesa e deputetëve opozitarë ka bërë që seanca të shtyhet disa herë gjatë ditës.
Fillimisht e paraparë për në orën 10:00, ajo u shty për në 14:00 nga kryetarja e Kuvendit, Albulena Haxhiu, me arsyetimin për t’i dhënë kohë opozitës të marrë pjesë.
Në nisje të seancës së dytë, Haxhiu u bëri sërish thirrje deputetëve opozitarë që të jenë të pranishëm dhe të marrin pjesë në votim, duke theksuar detyrimet ligjore të tyre.
“I lus ata që të vijnë në këtë seancë, ku si pikë e rendit të ditës është zgjedhja e Presidentit të Republikës së Kosovës”, deklaroi ajo.
Pavarësisht kësaj, për shkak të mungesës së opozitës, seanca u ndërpre sërish dhe u njoftua vazhdimi i saj në orën 19:00.
Edhe pas rinisjes, punimet u ndërprenë përsëri për të njëjtën arsye, ndërsa kryeparlamentarja bëri të ditur se seanca do të vazhdojë në orën 23:00, pak para skadimit të afatit kushtetues.
Deputetët e partive opozitare nuk morën pjesë në asnjërën nga seancat e ditës, duke vazhduar bojkotin e tyre, ashtu siç kishin bërë edhe më 27 prill.
Në atë seancë, Lëvizja Vetëvendosje propozoi dy kandidate për presidente: Feride Rushitin dhe Hatixhe Hoxhën.
Edhe pse pa kuorumin e nevojshëm, votimi u zhvillua, ku Rushiti mori 63 vota në rundin e parë, ndërsa Hoxha nuk mori asnjë votë, ndërkohë që një votë rezultoi e pavlefshme.
Kryeministri Albin Kurti ka zhvilluar disa takime me përfaqësues të opozitës për të arritur një marrëveshje, por pa sukses.
Opozita i ka cilësuar ofertat e tij si joserioze dhe të papranueshme, duke iu përgjigjur me bojkot të procesit./teve1.info/
