Këshilli i Përgjithshëm i Lëvizjes Vetëvendosje ka filluar mbledhjen, ku përveç çështjeve organizative, në rend dite është edhe tema e zgjedhjes së Presidentit të Kosovës.
Mbledhja, e cila ishte paralajmëruar të mbahej në orën 12:00, ka nisur me një orë vonesë.
Kryetari i partisë dhe njëherësh kryeministri i Kosovës, Albin Kurti, pas takimit të zhvilluar një ditë më parë me kryetarin e Partisë Demokratike të Kosovës, Bedri Hamza, në një deklaratë për media theksoi se mbledhja nuk është thirrur posaçërisht për çështjen e Presidentit, por është pjesë e obligimeve statutore të partisë, e cila mban katër mbledhje në vit.
Ai theksoi se viti 2026 është vit zgjedhor brenda Lëvizjes Vetëvendosje, çka kërkon përgatitje dhe organizim të brendshëm.
Megjithatë, ai shtoi se situata politike dhe procesi i zgjedhjes së Presidentit do të jenë pjesë e diskutimeve gjatë mbledhjes.
Kurti gjithashtu paralajmëroi se në mungesë të një marrëveshjeje politike apo kandidature konsensuale, subjektet politike mund të paraqesin propozimet e tyre partiake për postin e Presidentit të Republikës.
Kurti po ashtu bëri të ditur se Lëvizja Vetëvendosje pritet të dalë shpejt me një propozim të kandidaturës për President, por nuk është e qartë nëse kjo do të ndodhë gjatë mbledhjes së sotme.
“Ne do ta kemi mbledhjen e Këshillit të Përgjithshëm të Lëvizjes Vetëvendosje nesër. Natyrisht që mbledhjen e nesërme nuk e kemi thirrur enkas për çështjen e Presidentit të Republikës. E kemi thirrur para se gjithash, për shkak se është obligim statutor i yni kronologjik që t’i kemi katër mbledhje në vit, pra çdo tre muaj, dhe sidomos për shkak se sivjet, 2026-a është vit zgjedhor në Lëvizjen Vetëvendosje”, deklaroi Kurti para mediave.“Tash na duhen përgatitje të reja në LVV, por natyrisht që do ta diskutojmë edhe këtë çështje. Dhe duket që, kur s’ka mundësi për marrëveshje politike, kur s’ka mundësi për propozim konsensual, atëherë do të kemi propozime partiake që do të merren vesh shpejt”, theksoi ai dje para mediave./teve1.info/
