Presidentja e Kosovës, Vjosa Osmani, ka kërkuar reformim urgjent të sistemit ndërkombëtar të azilit, duke paralajmëruar se boshllëqet ekzistuese po keqpërdoren nga rrjete kriminale dhe po dëmtojnë refugjatët e vërtetë. Ajo foli në një tryezë të mbajtur në New York me temën “Sistemi Botëror i Azilit: Çfarë shkoi keq dhe si të rregullohet”, të organizuar nga ndihmës-sekretari amerikan i Shtetit, Christopher Landau.
“Është e nevojshme të ndërtohen rregulla më të shpejta dhe një kornizë ligjore më fleksibile. Vetëm përmes bashkëpunimit ndërkombëtar mund të luftojmë fenomenin e keqpërdorimit të azilit nga grupet e krimit të organizuar,” tha Osmani.
Duke kujtuar përvojën e saj si refugjate gjatë luftës në Kosovë, presidentja theksoi se manipulimi i sistemit nga bandat kriminale e bën edhe më të vështirë pozitën e atyre që kanë realisht nevojë për mbrojtje.
“Abuzimi me sistemin e azilit nga bandat kriminale e vështirëson situatën për ata që kanë realisht nevojë për mbrojtje,” tha ajo.
Osmani theksoi angazhimin e Kosovës në këtë fushë, duke përmendur bashkëpunimin e ngushtë me shtetet evropiane si dhe marrëveshjen e nënshkruar me SHBA-në për pranimin e shtetasve të tretë të dëbuar nga territori amerikan.
“Kosova është shteti i parë në Evropë që ka nënshkruar një marrëveshje të tillë me SHBA-në, si pjesë e mbështetjes për përpjekjet ndërkombëtare në luftën kundër migracionit të paligjshëm,” theksoi ajo, duke shtuar se edhe pse i vogël, vendi është i gatshëm të kontribuojë aty ku është e nevojshme.
Presidentja përmendi edhe harmonizimin e listës së organizatave terroriste me SHBA-në:
“Nëse një organizatë cilësohet si kërcënim për sigurinë kombëtare të SHBA-së, atëherë ajo trajtohet si terroriste edhe në Republikën e Kosovës,” deklaroi Osmani.
Në përmbyllje, ajo bëri thirrje për një qasje më efikase dhe të bashkërenduar ndërkombëtare:
“Nuk mund të lejojmë që rrjetet kriminale të bashkëpunojnë më mirë se shtetet. Duhet të krijojmë një sistem që i mbron ata që kanë realisht nevojë për mbrojtje.”
