Nga një prilli, pritet që të nis faza e dytë e liberalizimit të tregut të energjisë elektrike.
Krahas një mijë e 300 bizneseve që kaluan në treg të hapur, pritet që ky numër të rritet.
Faza e dytë i përfshin bizneset që kanë më shumë se 50 punëtorë ose që kanë qarkullim vjetor më shumë se 10 milion euro.
Kësisoj, ajo se çfarë do të ndodhë nga një prilli shihet si përditësim i tregut të energjisë.
“Faza e dytë e kalimit të bizneseve në tregun e lirë të energjisë nuk lidhet me ndonjë reformë tjetër, reformë të re të liberalizimit të tregut të energjisë. Mirëpo, është vetëm një përditësim i listës së bizneseve të cilat i plotësojnë kriteret e mbi 10 milionë euro qarkullim apo 50 punëtorë. Ndaj ka mundësi që bizneset tjera të reja t’i keni plotësuar këto kritere, apo bizneset ekzistuese të cilat janë pjesë e tregut të lirë, të mos i plotësojnë më këto kritere prandaj edhe duhet bërë përditësimi i listës së këtyre bizneseve”, thotë njohësi i energjestikës, Adhurim Haxhimusa.
Mirëpo, edhe për këtë fazë të dytë, vazhdojnë kritikat nga organizatat pro bizneseve.
Sipas Kushtrim Ahmeti nga Dhoma e Tregtisë dhe Industrisë, liberalizimi i tregut veç i ka dëmtuar bizneset.
“Këta janë t’u e bo edhe fazën e dytë në mënyrë të fshehtë. Pra, asnjë konsultim s’ka, asnjë komunikim me Komitetin e Bizneseve nuk ka. Na kemi marrë prej palëve të treta informatën dhe iu kemi drejtuar zyrtarisht, për të kuptuar detaje se çka po dëshirojnë të bëjnë me këtë proces”, tha Ahmeti.
Ahmeti thotë se edhe në fazën e dytë, janë duke u përsëritur gabimet e fazës së parë.
“Ajo që është m’u shqetësu prej kësaj pune është që prapë forma e përzgjedhur nuk është ajo që duhet me qenë. Gabimet që janë bërë në fazën e parë, po vazhdojnë të bëhen edhe në fazën e dytë. Ju e dini shumë mirë se në dhjetor e në janar, gjitha bizneset e sidomos edhe këto që kanë dalë në fazën e parë në treg të hapur, 1300, janë përballur me reduktime të tmerrshme të energjisë”, deklaroi ai.
Nga Zyra e Rregullatorit të Energjisë nuk kanë treguar për numrin e bizneseve që i plotësojnë kushtet për kalim në treg të hapur, e të cilave do t’iu kushtëzohet furnizimi me energji elektrike.
