Duke filluar nga 1 nëntori Policia e Kosovës nuk do të lëshojë më vërtetim për të kaluarën kriminale.
Sipas komunikatës së Policisë, përgjegjës për lëshimin e këtyre vërtetimeve mbetet Departamenti i Evidencës Qendrore Penale pranë Këshillit Gjyqësor të Kosovës.
Po ashtu bëhet e ditur se, ndërprerja e lëshimit të vërtetimeve i referohet Ligjit mbi Sistemin Qendror të Evidencës Penale, i cili shfuqizon çdo dispozitë tjetër ligjore që përcakton nxjerrjen apo lëshimin e certifikatave që ndërlidhen me evidencën penale.
“Policia e Kosovës, përmes kësaj komunikate zyrtare, njofton mediat dhe qytetarët se duke filluar nga data 01.11.2024, nuk do të lëshojë për palët kërkuese/qytetarët vërtetim për të kaluarën kriminale. Ndërprerja e lëshimit të vërtetimeve i referohet Ligjit Nr. 08/L-194 mbi Sistemin Qendror të Evidencës Penale, i cili shfuqizon çdo dispozitë tjetër ligjore që përcakton nxjerrjen apo lëshimin e certifikatave që ndërlidhen me evidencën penale. Departamenti i Evidencës Qendrore Penale pranë Këshillit Gjyqësor të Kosovës mbetet përgjegjës për t’i lëshuar këto vërtetime, prandaj palët kërkuese/qytetarët mund të aplikojnë në gjykatat që mbulojnë territorin e tyre”, thuhet në komunikatë. /teve1.info/
