Është nënshkruar marrëveshja 20 milionë euro për ujërat e zeza në Ferizaj.
Kështu ka bërë të ditur Ministria e Financave, ku thuhet se nga ky projekt përfitojnë 90 mijë qytetarë, kështu duke ndikuar në ruajtjen e burimeve lokale të ujërave.
“Ministri i Financave, Punës dhe Transfereve, Z. Murati dhe Drejtori i Bankës Evropiane për Rindërtim dhe Zhvillim në Kosovë, Z. Maslichenko nënshkruan sot një marrëveshje me vlerë 20 milionë euro. Përmes kësaj marrëveshje parashihet ndërtimi i impiantit për trajtimin e ujërave të zeza në Rajonin e Ferizajt përmes së cilit parandalohet shkarkimi i ujërave të zeza në lumenj. Nga ky projekt përfitojnë rreth 90 mijë qytetarë duke ndikuar në ruajtjen e burimeve lokale të ujërave. Gjithashtu, vlen të theksohet se projekti është në linjë me Strategjinë Nacionale të Ujërave për Kosovë (2023 -2027)”, thuhet në postimin e Ministrisë.
Gjatë ceremonisë së nënshkrimit, Ministri i Financave, Hekuran Murati, ka theksuar se ky projekt do të ndikojë në ruajtjen e ambientit në komunat e Ferizajt dhe Kaçanikut si dhe në të gjithë rajonin përreth.
Ndërkaq, Maslichenko, ka thënë se ky projekt do të ndihmojë në përmirësimin e cilësisë së mjedisit dhe shëndetit publik në Kosovë, përcjell teve1.info.
“Ne e vlerësojmë shumë bashkëpunimin me Qeverinë e Kosovës në sektorin e ujërave dhe mjedisit dhe shpresojmë që ky projekt të shërbejë si model i suksesshëm për projekte të ngjashme në të ardhmen”, ka deklaruar ai.
Po ashtu, në postim thuhet se të gjitha palët u pajtuan që të thellojnë bashkëpunimin në projekte të tjera me interes për qytetarët./teve1.info/.
