Me 71 vota pro, 9 kundër dhe 24 abstenime, Nenad Rashiq u zgjodh nënkryetar i Kuvendit të Kosovës.
Mirëpo, këtë vendim të të zgjedhurve të popullit, e rrëzoi Gjykata Kushtetuese.
Në aktgjykimin e plotë të publikuar gjatë pasdites, Kushtetuesja në 34 faqe ka renditur një sërë arsyesh.
Kryesorja është ajo se nënkryetari serb i Kuvendit duhet të zgjedhet pasi të jetë votuar nga shumica e komunitetit që përfaqëson.
“Gjykata rithekson se propozimi për nënkryetar të Kuvendit nga radhët edeputetëve të komuniteteve që nuk janë shumicë, në rastin konkret, të komunitetit Serb, duhet që të bëhet nga shumica apo numri më i madh i deputetëve nga radhët e deputetëve të komunitetit Serb” , ka njoftuar Kushtetuesja.
Në aktgjykim theksohet gjithashtu se votimi i nënkryetarit duke përjashtuar votën e deputetëve të komunitetit të tij, nuk mund të përdoret si mekanizëm debllokues.
“Në vlerësimin e Gjykatës, zbatimi i këtyre mekanizmave në një mënyrë që do të çonte në rrethana ku shumica e deputetëve të Kuvendit përcakton se kush do të jetë përfaqësuesi i një komuniteti që nuk është shumicë pa propozimin e këtyre të fundit, në thelb, do të përbënte anashkalim të garancive formale të përcaktuara në Rregulloren e Kuvendit. (118)“, thuhet tutje në njoftim.
Në aktgjykim, specifikohet se nënkryetari i Kuvendit nga komunitetet shumicë duhet propozuar vetëm nga grupi parlamentar i këtij komuniteti.
Andaj, konstatohet se mekanizmi debllokues, duke përdorur procedurën e shortit nuk është në pajtim me frymën dhe qëllimin për të cilën e njëjta është paraparë.
Në fund, është theksuar se bazuar në parimin e bashkëpunimit dhe mirëbesimit, u takon deputetëve që të gjejnë mënyrën për zgjedhjen e këtyre pozitave, Kryetarit dhe nënkryetarëve.
Sipas aktgjykimit, kjo bëhet bazuar në propozimet e shumicës së deputetëve që propozojnë kandidatët për nënkryetar nga radhët e komuniteteve që nuk janë shumicë.
