Në tenda e në të ftohtë.
Në këtë mënyrë punëtorët e ndërmarrjes “Pastrimi”, tash e katër ditë po mbajnë grevë në oborrin e Komunës së Prishtinës.
“Grevë të mirë nuk ka, grevat janë të detyrueshme se na kanë detyruar të vijmë këtu. Nuk e kemi bërë për qejf, kërkesat tona të cilat ishin janë ende. Sot e diele ata pushojnë e ne punojmë, realisht ne punëtorët e “ Pastrimit” punojmë të shtunën e diele na nuk ndalemi. Kushtet siç po e shihni i kemi pak se po është kohë e ftoftë, e na kanë ndihmuar edhe qytetarët me këto që po i shikoni, po vazhdojmë”, thotë Ardian Krasniqi, kryetar i shoqatës së punëtorëve.
Këta punëtorë, po kërkojnë që komuna e Prishtinës t’ia paguaj ndërmarrjes borxhin prej 2.7 milionë euro, mospagesa e së cilit kompaninë e ka vendosur në vështirësi financiare.
“Kjo grevë ka me vazhduar deri në atë momentin që të marrim një zgjidhje, zgjidhjen e kërkojmë prej Komunës, ajo është zgjidhja jonë. Ne punojmë më tri ndërrime, ndërrimi i parë, i dytë dhe i tretë, këta punë nuk kanë më, tash këta vijnë me ndërrime e kështu është sistemi i grevës”, thotë Krasniqi.
Gjithë fajin për situatën e krijuar, punëtorët ia lënë komunës që drejtohet nga Përparim Rama.
“Pengesa kryesore që na është ardh neve e që ne sot jemi këtu është thirrja e Komunës së Prishtinës që pagesat e mbeturinave të behën në Komunën e Prishtinës e jo në kompaninë “ Pastrimi” fajin kryesor për këtë e akter kryesor i kësaj ngjarje është e ne që jemi në grevë është drejtori i shërbimeve publike”, thotë Sami Sopi – sekretar i sindikatës.
Grevisti Asllan Mehmeti që ka 25 vite që punon në këtë ndërmarrje, falënderon ata të cilët po kujdesen që greva e tyre të jetë me e lehtë.
“Duke i falënderuar qytetarët sa jam unë këtu qe dy ditë na kanë sjell me ngrenë e me pi, sindikata pak në mundësitë e veta që i ka, po mundohemi me u mbajt disi. Por çka kemi me bo, ftoftë pak e kemi por i kemi këto nxehje këtu, grevat nuk janë të mira”, shprehet ai.
Para se të nisnin grevën, punëtorët e ndërmarrjes “Pastrimi” protestuan më 19 maj para objektit të komunës së Prishtinës.
