Në mungesë të anëtarit nga radhët e Fakulteteve Juridike Agron Bekës dhe anëtares prokurore nga Prokuroria Themelore në Prishtinë Jehona Grantolli, është shtyrë takimi i 232-të i Këshillit Prokurorial të Kosovës (KPK).
Shtyrjen e këtij takimi e ka konstatuar kryesuesi i Këshillit Prokurorial të Kosovës, Jetish Maloku i cili në fillim të këtij takimi bëri të ditur mungesën e anëtarëve Beka e Grantolli, raporton “Betimi për Drejtësi”.
Kryesuesi Maloku ka thënë se anëtari Beka mungon për arsye familjare, ndërsa anëtarja Grantolli për arsye shëndetësore.
Gjithashtu, Maloku bëri të ditur se Ushtruesi i Detyrës së Kryeprokurorit të Shtetit Besim Kelmendi gjendet në një takim jashtë Prishtinës mirëpo i njëjti ishte pjesë e takimit përmes platformës “Zoom”.
Edhe pse i njëjti fillimisht ndërpreu takimin për disa minuta për të pritur nëse anëtarët Beka e Grantolli do të bashkëngjiten në këtë mbledhje, por edhe përkundër pritjes të njëjtit nuk arritën të paraqiten.
Andaj, takimi i paraparë për këtë të martë është shtyrë, ndërsa takimi i radhës u caktua më 27 korrik 2023. /BetimipërDrejtësi
