Në pesë ndeshjet e fundit Malisheva ka marrë vetëm një fitore, atë ndaj Lirisë, derisa ka pësuar ndaj Llapit, Ballkanit, Dritës dhe së fundmi Dukagjinit.
Kësisoj trajneri Senad Alirifa mori një vendim duke dhënë dorëheqje nga skuadra e Malishevës, ndonëse në dhjetë ndeshje ka arritur katër fitore, por Alirifa si të rrugës e ka parë ndërprerjen e marrëveshjes me klubin e Malishevës.
Te Malisheva pranuan dorëheqjen, por vetëm pas insistimit të trajnerit Alirifa. Derisa në mesazhin e Malishevës për dorëheqjen e trajnerit Alirifa, ndër të tjera thuhet se kanë ndjerë keqardhje për largimin e tij dhe se rezultate jo të kënaqshme nuk ia adresuan vetëm trajnerit, por duke marrë përgjegjësi të plotë edhe si klub për këtë gjendje.
“Me keqardhje kemi pranuar dorëheqjen e trajnerit Senad Alirifa nga pozita e krytrajnerit në FC Malisheva. Pas një periudhe të vështirë në klub dhe pas disa rezultateve jo të kënaqshme kohëve të fundit, trajneri Alirifa ndjeu përgjegjësinë profesionale për të dhënë dorëheqje, edhe pse përgjegjësia për rezultatet e fundit jo të mira ishte e të gjithë neve në FC Malisheva dhe jo vetëm e tij”, ka shkruar FC Malisheva.
Klubi gjithashtu përgëzuar Alirifën për punën profesionale dhe angazhimin e tij për gjatë fazës së parë në Superligë.
“Klubi e falenderon trajnerin Alirifa për punën profesionale dhe angazhimin e tij duke i dëshiruar suksese në të ardhmen dhe shëndet të mirë”, ka shkruar tutje FC Malisheva.
Ndërsa po në këtë njoftim te Malisheva kanë bërë të ditur se kanë emëruar për trajner asistenin e Alirifës, Qëndrim Kidën.
“Pozitën e kryetrajnerit do ta marr asistenti i parë i skuadrës Qëndrim Kida, i cili edhe zyrtarisht është emëruar kryetrajner në FC Malisheva”, ka shkruar FC Malisheva.
Kida ndeshjen debutuese të tij si trajner i Malishevës, do ta ketë në udhëtim te Fushë Kosova, ndërsa në klub kanë uruar emërimin e tij duke i dëshiruar rezultate pozitive.
“Përgëzojmë trajnerin e ri Kida duke i uruar suksese dhe rezultate pozitive në të ardhmen”, ka shkruar FC Malisheva.
Malisheva pas dhjetë ndeshjeve zë vendin e pestë me 12 pikë.
