Babai i Salih Mustafës, Jahja Mustafa, ka ndërruar jetë mëngjesin e sotëm, pas një periudhe të gjatë në gjendje të rëndë shëndetësore.
Lidhur me gjendjen e tij, ishte raportuar se Salih Mustafa kishte kërkuar leje për ta vizituar babain, mirëpo kjo kërkesë ishte refuzuar nga Gjykata Speciale.
Kryetari i Organizatës së Veteranëve të Luftës së UÇK-së (OVL-UÇK), Hysni Gucati, ka reaguar duke thënë se Mustafës nuk iu lejua vizita, pavarësisht se babai i tij ishte në gjendje kritike për jetën.
“Lajmi për vdekjen e Bacës Jahja Mustafa na preku thellë. Dhimbja bëhet edhe më e rëndë kur djali i tij, shoku dhe bashkëluftëtari ynë, po mbahet padrejtësisht nga Gjykata Speciale dhe nuk iu lejua mundësia ta vizitonte babain në momentet e fundit të jetës”, ka shkruar Gucati.
Ai ka shprehur ngushëllime për familjen, miqtë dhe të gjithë ata që e kanë njohur të ndjerin Jahja Mustafa.
