Një shofer nga Ferizaj është ndalur nga policia më 15 nëntor, pas kapjes me shpejtësi prej 124 km/h në një zonë me kufizim shpejtësie 60 km/h, në rrugën magjistrale Ferizaj–Prishtinë, në fshatin Prelez i Jerlive.
Policia e Njësisë së Komunikacionit Rrugor, gjatë patrullimit në orën 19:40, ka vërejtur shkeljen e rëndë të shpejtësisë dhe ka ndërhyrë menjëherë për të ndaluar vozitësin, identifikuar si M.S., 37 vjeç, i cili udhëhiqte një automjet të markës VW Golf me targa vendore.
Për shkeljen e rregullave të trafikut, ndaj shoferit është shqiptuar një gjobë prej 300 euro, ndërsa gjithashtu është marrë masa e ndalimit të drejtimit të automjetit në territorin e Republikës së Kosovës për një periudhë prej 3 muajsh, pasi shoferi posedonte patentë shofer të huaj.
“Policia Rajonale në Ferizaj u bën thirrje të gjithë shoferëve që të respektojnë kufizimet e shpejtësisë, pasi paraqet rrezik serioz për jetën e tyre dhe të pjesëmarrësve të tjerë në trafik. Policia do të intensifikojë kontrollet me radarë në të gjitha rrugët e rajonit me qëllim rritjen e sigurisë rrugore dhe fton qytetarët të raportojnë çdo shkelje në numrat: 192, 0290/326-250, 0290/322-406 ose përmes aplikacionit “Lajmëro Policinë”. Të gjitha informacionet trajtohen me konfidencialitet të plotë”, theksohet në njoftim.
