Është ndërprerë sërish seanca konstituive e Kuvendit të Kosovës, pasi deputetët e Partisë Demokratike të Kosovës kanë lëshuar sallën, pas mosvotimit të kandidates së tyre për nënkryetare, Vlora Çitaku.
Kandidatja e PDK-së nuk mori mbështetjen e deputetëve të Lëvizjes Vetëvendosje, ndërsa më pas Grupi Parlamentar i PDK-së u largua nga salla.
Kryetarja e Kuvendit, Albulena Haxhiu, e ka ftuar PDK-në që të bëjë një propozim të ri për këtë pozitë, por një propozim i tillë nuk është bërë.
“Seanca ndërpritet. Për vazhdimin e seancës do të njoftoheni më pas”, ka deklaruar Haxhiu.
Ndërkohë, paraprakisht Ardian Gola nga LVV-ja është zgjedhur nënkryetar i Kuvendit nga radhët e këtij subjekti, me 101 vota për.
Deputetët e PDK-së e kishin mbështetur kandidaturën e Golës, ndërsa kandidatura e Vlora Çitakut nuk mori votat e nevojshme.
Seanca pritet të vazhdojë pas njoftimit të Kryesisë së Kuvendit për hapat e mëtejmë.
