Sërish, Komisioni Qendror Zgjedhor të martën nuk e certifikoi Listën Serbe për zgjedhjet e parakohshme parlamentare të 28 dhjetorit.
E ky vendim i KQZ-së, ka ngjallur reagime vendore e ndërkombëtare.
Për mos-certifikim të Listës Serbe, Ambasada e Shteteve të Bashkuara të Amerikës në Kosovë gishtin e drejton kah Lëvizja Vetëvendosje.
“Përpjekjet e VV-së për të bllokuar certifikimin e Srpska Listës për të marrë pjesë në zgjedhjet e Kosovës janë të ngushta në vizion dhe përçarëse. Të gjithë qytetarët e Kosovës duhet të jenë në gjendje të ushtrojnë të drejtat e tyre demokratike. Veprime të tilla cenojnë stabilitetin e Kosovës dhe interesat e SHBA-së, përfshirë rifillimin e dialogut tonë strategjik për të avancuar mundësitë për bizneset amerikane dhe kosovare”, thuhet nga ambasada amerikane.
Vendimin e KQZ-së, e kanë dënuar edhe Zyra e Bashkimit Evropian, Ambasadori britanik në Kosovë, Jonathan Hargreaves, dhe Ambasada e Gjermanisë.
Por këto reagime nuk i ka komentuar kryeministri në detyrë, dhe njëherit kryetari i Lëvizjes Vetëvendosjes, Albin Kurti.
Megjithatë, se në çfarë janë bazuar për mos certifikim tregon anëtari i VV-së në KQZ, Alban Krasniqi.
Madje Krasniqi thotë se po pret që të mos ketë epilog si herën e kaluar nga Paneli Zgjedhor për Ankesa dhe Parashtresa.
Por që ky vendim është i kundërligjshëm e thotë edhe Vullnet Bugaqku nga Instituti Demokratik i Kosovës.
KQZ-ja edhe në zgjedhjet e 9 shkurtit nuk e kishte certifikuar Listën Serbe, por Paneli Zgjedhor për Ankesa dhe Parashtresa e kishte urdhëruar KQZ-në ta certifikonte partinë më të madhe të serbëve në Kosovë.
