Deputetja e Lëvizjes Vetëvendosje, Arbërie Nagavci, ka bërë të ditur se në takimin e kryetares së Kuvendit me përfaqësuesit e partive politike parlamentare është dakorduar që seanca konstituive e legjislaturës së 11-të të mbahet më 6 gusht.
Nagavci tha se seanca do të zhvillohet sipas rendit të ditës të përcaktuar me Rregulloren e Kuvendit.
“U dakorduam që, sipas ftesës, më 6 gusht të mbahet seanca konstituive e legjislaturës së 11-të, sipas rendit të ditës të përcaktuar me rregullore”, deklaroi ajo.
Ajo theksoi se Vetëvendosje, si subjekt që ka fituar zgjedhjet, është e gatshme që sa më shpejt të bëjë konstituimin e institucioneve të reja dhe të vazhdojë punën me kompetenca të plota.
“Si subjekt që i ka fituar zgjedhjet, jemi të gatshëm dhe mezi presim të konstituojmë të gjitha institucionet dhe të vazhdojmë punën me kompetenca të plota në legjislaturën e 11-të, në Qeverinë e Kosovës dhe më pas edhe me zgjedhjen e presidentit apo presidentes brenda afatit të përcaktuar”, tha Nagavci.
Duke komentuar vendimin e Kuvendit të LDK-së për vazhdimin e bisedimeve me kryetarin e LVV-së, Albin Kurtin, Nagavci tha se ky është një zhvillim i mirëpritur.
“Ne natyrisht e mirëpresim këtë vendim të Kuvendit të LDK-së dhe presim që të vazhdojnë diskutimet dhe dakordimi, sepse vendi ka nevojë që sa më parë të vazhdojë puna”, u shpreh ajo.
E pyetur nëse pritet një takim mes Kurtit dhe kryetarit të LDK-së, Lumir Abdixhikut, Nagavci tha se kjo çështje varet nga liderët e dy subjekteve politike.
“Kjo çështje vendoset mes kryetarit të LVV-së dhe atij të LDK-së. Besoj që në afatin më të shkurtër të mundshëm do të vazhdojnë bisedimet”, deklaroi ajo.
Nagavci tha se deri tani nuk ka ndonjë marrëveshje në parim me LDK-në për ndarjen e pozitave.
“Deri më tani nuk ka asnjë dakordim për pozita të caktuara, por besoj se më e rëndësishmja është vullneti për t’i ofruar vendit institucione funksionale”, përfundoi Nagavci.
