Shefja e Grupit Parlamentar të Lëvizja Vetëvendosje, Arbërie Nagavci, ka reaguar sot pas mbledhjes së kryesisë lidhur me deklaratat e deputetit të Guxo, Fatos Geci, të bëra në seancën parlamentare të së martës.
Nagavci tha se menjëherë pas deklarimit të Gecit në Kuvend është distancuar nga gjuha e përdorur, duke theksuar se qëndrimet e tij janë personale dhe nuk përfaqësojnë qëndrimin e subjektit të saj politik.
“E kam përsëritur edhe njëherë qëndrimin që është i ditur. LVV respekton dhe nderon vlerat e luftës së drejtë, të pastër të UÇK-së dhe beson që Gjykata Speciale është një padrejtësi që i është bërë Kosovës. Besojmë që ky mekanizëm ka të bëjë me një trajtim jo të drejtë dhe jo të barabartë, dhe të gjithë ata që kanë mundësuar krijimin e saj i kanë sjellë dëm Kosovës, me pasoja me të cilat po përballemi çdo ditë”, deklaroi Nagavci.
Ajo sqaroi se Geci vetëm kishte njoftuar se do të merrte fjalën, por nuk kishte bërë të ditur përmbajtjen e deklarimit që shkaktoi reagime të shumta.
“Ai ka kërkuar miratimin tim si kryetare e Grupit Parlamentar që të marrë fjalën, por në asnjë moment nuk e ka bërë të qartë se çfarë do të deklaronte. Fjalia që përdori me të drejtë shkaktoi debat dhe u dënua nga të gjithë”, u shpreh ajo.
Nagavci dënoi gjithashtu gjuhën seksiste të përdorur ndaj nënkryetares së Kuvendit nga Partia Demokratike e Kosovës, Vlora Çitaku.
“E dënoj një gjuhë të tillë, sidomos në Kuvend, por edhe në çdo institucion tjetër. Angazhimi ynë duhet të jetë që një gjuhë e tillë të mos përdoret në asnjë rast”, theksoi ajo.
Sa i përket masave eventuale ndaj Gecit, Nagavci theksoi se ai është deputet i partisë Guxo dhe se përgjegjësia për vendime të tilla i takon asaj partie.
“Janë deklarata individuale të deputetit Geci. Sa i përket masave dhe vendimeve, ai është pjesë e Guxo-s. Si Lëvizje kemi shprehur qëndrimet tona përmes kryeministrit, meje dhe kryetares së Kuvendit”, përfundoi Nagavci.
