Rrugën po e bën nga sheshi kryesor i kryeqytetit.
Por ndalesa e tij është disa metra larg.
Ragmi Mustafi nga Lugina e Preshevës, synim e ka Kuvendin e Kosovës.
Në zgjedhjet e 7 qershorit ai është kandidat për deputet nga Lëvizja Vetëvendosje.
Më herët, në këtë institucion nuk ka pasur përfaqësues nga Presheva, Bujanoci dhe Medvegja.
Për Mustafin, kjo rrugë po bëhet më shumë që të jetë zëri i qytetarëve që janë nga tri komunat shqiptare.
“Lugina e Preshevës dhe Kosova nuk janë dy bota të ndryshme, nuk janë dy histori të ndryshme, është po e njëjta histori. Angazhimi do të jetë akomodimin e shqiptarëve të Luginës së Preshevës që janë tashmë në Kosovë e që të krijohet hapësirë për mundësi të barabarta për të gjithë ata dhe njëkohësisht për të gjithë shqiptarët që janë duke jetuar në Preshevë, Bujanoc dhe Medvegjë ti krijojmë hapësirë që të mbesin aty përmes mbështetjes së Qeverisë së Kosovës, si për studentë, për bursa e kuota”, ka thënë Mustafi për Tëvë1.
Ai madje thotë se ka marrë përkrahje nga qytetarë për të arritur këtë synim.
“Ka ardhë koha përfundimisht që edhe në Kuvendin e Republikës së Kosovës të jetë një zë aktiv i drejtpërdrejt dhe autentik i shqiptarëve të Preshevës, Bujanocit dhe Medvegjës. Kanë ardhë shumë urime, shumë urata, shumë mbështetje gjithandej nga shqiptarët që janë të Preshevës, Bujanocit dhe Medvegjës, sepse ashtu ku na rrahin zemrat bashkë të Luginës dhe Kosovës, ashtu do të shkrijmë kufirin si në sport,si në art e kulturë, do të shkrijmë këtë më dashninë e madhe”, thotë Mustafi.
Ish kryetari i Këshillit Kombëtar ka një thirrje për të gjithë bashkëvendësit e tij që jetojnë në Kosovë.
“Kanë të drejtë vote një numër i konsiderueshëm sa i përket këtu në Prishtinë, Fushë Kosovë në Gjilan e Kamenicë dhe gjithandej nëpër Kosovë, unë besoj se të gjithë ata do të votojnë për ato që janë të rëndësishme për ta. Por unë i ftoj të votojnë për Lëvizjen Vetëvendosje dhe numrin tim 45 në të cilin jam unë, në mënyrë që bashkërisht të rrahin zemrat aty ku do të trajtohet çështja e Luginës me seriozitet”, shprehet ai.
Para Mustafit edhe disa kandidatë të tjerë nga Lugina e Preshevës kandiduan për deputetë në Kuvendin e Kosovës. Mirëpo, asnjëri nga ta nuk ia doli që të siguroj ulëse.
