Detaje të reja janë bërë publike në konferencën për media lidhur me aksionin e realizuar nga Prokuroria Speciale, Policia e Kosovës dhe AKI-ja, ku u arrestuan pesë persona dhe u sekuestruan mbi 37 kilogramë substancë e dyshuar narkotike e llojit heroinë.
Reshan Murseli nga Drejtoria për Hetimin e Narkotikëve, ka bërë të ditur se droga është gjetur në disa lokacione dhe ishte e paketuar në forma të ndryshme.
Sipas tij, gjatë bastisjes fillimisht është gjetur një sasi e dyshuar e heroinës në një qese najloni, ndërsa më pas janë zbuluar edhe 31 paketime të tjera, të kamufluara brenda një pakoje letre me produkte komerciale.
Po ashtu, në banesën e të dyshuarit me inicialet I.S., shtetas turk, është gjetur dhe konfiskuar edhe një kilogram substancë e dyshuar heroinë.
Në total, sipas Murselit, janë sekuestruar 62 paketime me peshë të përgjithshme mbi 37 kilogramë.
Gjatë operacionit policia ka gjetur edhe një makinë për peshimin e drogës, për të cilën dyshohet se do të përdorej nga të dyshuarit për shtimin e sasisë dhe përpunimin e narkotikëve.
“Gjatë bastisjes, fillimisht policia ka gjetur një sasi të drogës të dyshuar e cila solli rezultatin e heroin, e cila ka qenë e vendosur në një qese najlloni dhe më pas është gjetur edhe një sasi e drogës e ndarë në 31 paketime e cila ishte e kamufluar në një pako letre, brenda disa llojeve komerciale, po ashtu te banesat e bastisura te i dyshuari I.S shtetas turk është gjetur dhe konfiskuar një sasi një kilogramë të dyshuar për heroinë, dmth në total kemi gjetur 62 paketime në peshë totale mbi 37 kilogramë, në vendin e ngjarjes është gjetur një makinë e cila shërben për pesatim të drogës, të dyshuarit kanë pasur përqëllim të shtimit të sasisë dhe përpunimit të saj dhe i njëjti mjet konfiskohet si provë material.Në këtë operacion u sekuestruan para të gatshme në vlerë 5 mijë e 300 euro dhe 100 dollarë, u sekuestruan një veturë, 10 telefona celularë një DVR i kamerave”, ka deklaruar ai./teve1.info/
