Ministri në detyrë i Financave, Hekuran Murati, ka deklaruar se njëri nga pesë vendimet e para në mandatin qeveritar pas 28 dhjetorit do të jetë rikthimi i masës për subvencionimin e faturave të energjisë elektrike për familjet që kursejnë energji.
Sipas Muratit, kjo masë ishte zbatuar edhe më herët dhe përmes saj ishin mbështetur mbi 200 mijë familje në vend.
Përmes një postimi në Facebook, Murati ka bërë të ditur se edhe gjatë këtij muaji mbi 90 mijë familje të cenueshme kanë përfituar subvencionimin e faturave të energjisë elektrike.
Ai ka sqaruar se programi i mbështetjes financiare, si çdo vit, mbulon periudhën gjashtëmujore të dimrit, nga tetori deri në mars.
“Edhe këtë muaj janë mbi 90 mijë familje të cënueshme që kanë pranuar subvencionin e faturave të energjisë elektrike. Sikurse çdo vit tashmë, programi mbulon periudhën 6-mujore të dimrit (tetor-mars). Subvencioni bëhet çdo muaj direkt në faturë dhe mund të shihet në llogarinë online që keni me furnizuesin.Ndërkaq, njëri nga 5 vendimet e para në mandatin pas 28 dhjetorit do të jetë rikthimi i masës për subvencionim të faturave të atyre që kursejnë energjinë elektrike, masë përmes së cilës në të kaluarën ishin mbështetur mbi 200 mijë familje”, ka shkruar Murati./teve1.info/
