Brikena Muharremi, kandidate për deputete nga Lidhja Demokratike e Kosovës, ka folur në emisionin “Info Nata” në Tëvë1 për arsyet që e shtynë të hyjë në politikë dhe të kandidojë për herë të parë për deputete.
Muharremi tha se vendimi i saj për t’iu bashkuar garës zgjedhore lidhet me dëshirën për të kontribuar në zhvillimin e Kosovës, duke sjellë përvojën e saj më shumë se 20-vjeçare në fushën e menaxhimit dhe udhëheqjes në Mbretërinë e Bashkuar.
“Futja ime për herë të parë në zgjedhjet parlamentare si kandidate për deputete vjen nga shqetësimi që kam për faktin se Kosova vazhdon të jetë ndër vendet më të varfra në Evropë. Më shqetëson gjithashtu largimi i të rinjve nga vendi dhe Kosova ka filluar të zbrazet. Dëshiroj që përvojën time mbi 20-vjeçare në sistemin e udhëheqjes në Britaninë e Madhe ta përdor për të mirën e Kosovës dhe të punoj me njerëzit tanë, të cilët janë jashtëzakonisht të aftë dhe arrijnë rezultate të mëdha kur u jepet mundësia. Kosova meriton të arrijë potencialin që e ka”, ka deklaruar Muharremi.
Ajo ka treguar edhe arsyet pse ka vendosur t’i bashkohet LDK-së.
Sipas Muharremit, LDK ishte subjekti politik që i ofroi mundësinë për kandidim, ndërsa theksoi se ka marrë ftesë edhe nga presidentja Vjosa Osmani për t’u bërë pjesë e iniciativës së saj politike.
“Arsyeja pse jam kyçur në LDK është se ky subjekt më ka ftuar të kandidoj. Gjithashtu, edhe Vjosa Osmani më ka ftuar të jem pjesë e saj dhe për mua ka qenë privilegj të jem pjesë e një liste të udhëhequr nga zonja Osmani. Një tjetër arsye është se në LDK e kam gjetur veten dhe vlerat me të cilat identifikohem”, ka thënë Muharremi./teve1.info/
