Kupa e Afrikës ka prodhuar dje një rezultat mbresëlënës me kualifikimin e skuadrës së Mali në çerekfinalet e turneut, pasi eliminoi në fazën 1/16 ekipin e Tunizisë.
Pasi kishte kaluar grupin falë tre barazimeve ndaj Marokut, Zambias dhe Ishujve Komoros, Mali ia doli që të vazhdonte më tej në turne përsëri falë një barazimi, pasi triumfoi vetëm me penallti ndaj tunizianëve.
Këta të fundit kaluan në avantazh në minutën e 88 me anë të Shauat dhe dukej se mund të merrnin fitoren përballë një ekipi që kishte mbetur me 10 lojtarë për kartonin e kuq të Kulibali që në minutën e 26. Por një penallti e realizuar nga Sinajoko në minutën e 96-të, bëri që sfida të shkonte me shtesa.
Aty Tunizia kishte 70% mbajtje topi, por përsëri nuk ia doli të shënonte dhe ndeshja shkoi te penalltitë, ku lojtarët e Malit ishin më të saktë dhe triumfuan me shifrat 3-2, duke siguruar një kualifikim unik në çerekfinale.
