Trajneri Jose Mourinho ka marrë një ofertë të majme për të punuar në Arabinë Saudite, përcjell “Corriere dello Sport” të enjten. Mësohet se atij i është ofruar kontratë dyvjeçare në vlerë prej 120 milionë eurosh të jetë në krye të Përfaqësueses së Arabisë Saudite apo e njërit prej klubeve Al-Nassr dhe Al-Ahli.
Thuhet se Mourinho tashmë e ka shqyrtuar ofertën me stafin e tij dhe mbetet të shihet nëse do të zhvendoset në Arabinë Saudite në fund të këtij sezoni. Aktualisht Mourinho është në krye të Romës, ekip me të cilin ka kontratë deri në vitin e ardhshëm.
Portugezi më herët ka deklaruar se dëshiron që ta vazhdojë punën me ekipin italian, në krye të të cilit është prej vitit 2021.
