Mbrojtësi i krahut të majtë, Mario Mitaj ka lënë përshtypje pozitive në debutimin e tij te skuadra nga Arabia Saudite, Al-Ittihad.
Mitaj ishte titullar dhe luajti deri në minutën e 70-të, në fitoren 3:0 të Al-Ittihadit ndaj Al-Ain në kuadër të Kupës së Arabisë, ndërsa 21-vjeçari është vlerësuar me notën 7.2 për paraqitjen e tij.
Në fakt, vlerësimet ishin të larta për futbollistin e Kombëtares së Shqipërisë, i cili po ashtu ka reaguar pas debutimit me fanellën e ekipit saudit.
Madje, është thënë se Mitaj është një lojtar i kompletuar dhe në të ardhmen do të jetë njëri nga lojtarët më të mirë të huaj në futbollin e Arabisë Saudite.
“Shumë i lumtur me debutimin tim dhe fitoren e ekipit. Atmosferë e këndshme nga tifozët tanë. Le të shkojmë tigra”, ka shkruar Mitaj në rrjetin social “Instagram”.
Mitaj gjatë kësaj vere u transferua tek Al-Ittihad nga Lokomotiva e Moskës për 3.5 milionë euro dhe me ekipin saudit ka kontratë deri në vitin 2027.
