Që nga përfundimi i luftës në vitin 1999, në territorin e Kosovës kanë operuar struktura ilegale të mbështetura dhe të financuara nga shteti i Serbisë.
“Mbrojtja Civile” dhe “Brigada e Veriut”, si formacione të tilla, u shpallën nga Qeveria e Kosovës si organizata terroriste.
Formalisht, “Mbrojtja Civile” është shuar me Marrëveshjen e Brukselit të 26 marsit 2015, nëpërmjet të cilës parashihej sistemimi i 483 pjesëtarëve të kësaj organizate në institucionet qendrore të shtetit.
Por, përkundër marrëveshjes së arritur me ndërmjetësimin e BE-së, strukturat ilegale serbe kanë vazhduar të operojnë në Kosovë, veçmas në veri të vendit.
Njohës të çështjeve të sigurisë dhe analistë politikë e shohin me vend që Qeveria më në fund ka marrë vendim që t’i shpall si organizata terroriste “Mbrojten Civile” dhe “Brigadën e Veriut”.
Avni Islami thotë se një hap i tillë hap rrugët për dënimin e veprave të shkaktuara nga grupet e organizuara.
Ndërsa, profesori universitar Seb Bytyçi tregon benefitet nga shpallja e këtyre dy strukturave terroriste.
“Kjo e lehtëson ndjekjen penale të këtyre personave të përfshirë në sulmet ndaj KFOR-it, Policisë dhe gazetarëve. Tashmë e dimë që ka pasur përkrahje nga shtetet perëndimore që të ndodhë kjo ndjekje e atyre personave dhe nuk do të duhej të kishte pasoja për Kosovën një gjë e tillë, edhe pse nga disa faktorë mund të shihet si hap eskalues nga ana e Kosovës”, vlerëson Bytyçi.
Ndërkohë edhe pse nuk dihet kush qëndron mbrapa këtyre dy organizatave serbe, në rrjete sociale, përfshirë platformën e komunikimit “Telegram”, “Brigada e Veriut” ka një llogari, në të cilën publikon vazhdimisht informacione për situatën në pjesën veriore të Kosovës.
