Ministrja e Drejtësisë, Albulena Haxhiu, ka ftuar deputetët e Kuvendit që me shpejtësi të votojnë themelimin e një Komisioni Hetimor, që sipas saj, të shihet se çfarë ka ndodhur ndër vite Institutin e Mjekësisë Ligjore.
Haxhiu tha se përkundër tentimeve që ta kthejnë besimin e qytetarëve në IML sipas saj, “duket që krimi është shumë i madh”.
“Edhe kur nuk po funksionon siç duhet Sistemi i Drejtësisë sepse ju e dini që për mostrat e Astrit Deharit ende asnjë person nuk është i dyshuar, edhe për faktin se vetëm katër persona kanë pasur qasje në vendin ku ruhen mostrat. Pra në këto rrethana unë ju kërkoj me shpejtësi dhe pa asnjë vonesë që ta themeloni Komisionin Hetimor, sepse mendoj që kështu mund t’i ndihmoni Kosovës, mund t’i ndihmoni Institutit të Mjekësisë Ligjore në mënyrë që veprimet që kanë ndodhur deri tani të adresohen. Dhe nuk po shoh institucion tjetër që mund ta bëjë tani për tani më mirë”.
“Unë kam pasur komunikim edhe me kryetarin e Kuvendit për këtë edhe me shefen e Grupit Parlamentar, Mimoza Kusari – Lila, pra e kam përmendur këtë çështje ndonëse ka pasur përpjekje maksimale që ta kthejmë besimin e qytetarëve në Institutin e Mjekësisë Ligjore, duket që krimi është shumë i madh. Prandaj kërkoj mbështetjen tuaj që ta themelojmë Komisonin Hetimor dhe të shohim ndër vite se si kanë ndodhë të gjitha ato që janë përfolë nga mediat, qytetarët, Kuvendi etj”, tha Haxhiu në Kuvendin e Kosovës.
Ndryshe, ministrja Albulena Haxhiu, pas zjarrit në IML ka konfirmuar se nga zjarri nuk janë dëmtuar mbetjet mortore, mostrat, e as arkivi i këtij institucioni.
Ajo më tej ka bërë të ditur se nga informacionet e para dyshohet se zjarri ndodhi si pasojë e defekteve në sistemin elektrik, ndonëse thotë se duhet të pritet që kjo të konfirmohet nga ekspertët.
Kujtojmë që ditën e martë rreth orës 08:00, në Institutin e Mjekësisë Ligjore në Prishtinë, dy zyra janë përfshirë nga zjarri. Policia menjëherë ka dalë në vendin e ngjarjes, po ashtu edhe zjarrfikësit të cilët lokalizuan zjarrin./teve1.info./
