Ministria e Mjedisit po shqyrton objekte të tjera për rrënim pranë resurseve ujore.
Rrënimet filluan me 21 korrik përreth Ujmanit.
Këtë fat e patën 11 villat, e ndërtuara pa leje në pronën e Ndërmarrjes “Ibër Lepenci”.
Por, shembja e objekteve ilegale përreth liqeneve, nuk pritet të ndodh vetëm në veriun e vendit.
Të njëjtin fat, mund ta kenë edhe ato pa lejë rreth liqenit të Badovcit dhe Batllavës.
Të paktën kështu ka paralajmëruar Ministria e Mjedisit, Planifikimit Hapësinor dhe Infrastrukturës.
“Në kuadër të të njëjtit prioritet strategjik, po shqyrtohen me intensitet të lartë edhe kërkesat e tjera institucionale që lidhen me uzurpimet dhe ndërtimet pa leje sidomos rreth Liqenit të Batllavës dhe Liqenit të Badovcit, dy burime kyçe të furnizimit me ujë të pijshëm për qytetarët tanë”, deklarojnë nga Ministria.
Por, çfarë ndikimi mund të kenë ndërtimet pa leje në afërsi të liqeneve?
Për këtë ceshtje foli ambientalisti Sami Makolli.
“Kjo dëmton cilësinë e ujit, pasi në të derdhen fekale, detergjent, mjete pastrimi, azot dhe fosfor. Si pasojë, krijohen alga, zvogëlohet niveli i oksigjenit në ujë, ngordhin peshqit, dëmtohet biodiversiteti dhe rrezikohet shëndeti publik. Rehabilitimi i këtyre zonave është më pas shumë i kushtueshëm”, tha Makolli.
Sipas tij, jo të gjitha ndërtimet përreth liqeneve mund të paraqesin problem.
“Ato zakonisht zhvillohen në bazë të planeve të qarta urbanistike, zonave të mbrojtura mjedisore dhe monitorimit të vazhdueshëm të projekteve që realizohen në ato zona. Pra, çështja nuk është domosdoshmërisht nëse duhet të lejohet apo jo ndërtimi. Ajo që është e rëndësishme është se ku duhet të lejohet të ndërtohet dhe në çfarë kushte urbanistike duhet të realizohet ai ndërtim”, pohoi ai.
Në fund, Ministria e Mjedisit, ka bërë të ditur se inspektorati I saj, po vijon identifikimin e plot objekteve ilegale përreth liqeneve.
