Ish-deputetja nga rradhët e LDK-së, Hykmete Bajrami ka akuzuar Ministrinë e Drejtësisë për shpallje të pozitave të larta drejtuese në kundërshtim me ligjin, por institucioni ka reaguar duke i cilësuar këto pretendime si “të pavërteta dhe tendencioze”.
Në reagimin zyrtar, Ministria e Drejtësisë ka theksuar se pretendimet e Bajramit nuk qëndrojnë as në aspektin faktik dhe as në atë ligjor, duke i konsideruar ato si përpjekje për krijimin e një perceptimi të rremë në opinionin publik lidhur me procese që, sipas ministrisë, janë zhvilluar në mënyrë të rregullt dhe ligjore.
Sipas ministrisë, procedurat për këto pozita janë iniciuar përmes kërkesës zyrtare për hapjen e tyre në kuadër të Planit të Rekrutimit për vitin 2026, e cila është dërguar më 27 prill 2026 në Ministrinë e Digjitalizimit dhe Administratës Publike, në kohën kur Qeveria ushtronte mandatin e plotë.
Në reagim thuhet se procesi është zhvilluar para hyrjes në fuqi të kufizimeve për Qeverinë në dorëheqje dhe se, bazuar në Ligjin për Zyrtarët Publikë, organizimi dhe zhvillimi i procedurave të rekrutimit për pozitat e larta drejtuese realizohet nga ministria përgjegjëse për administratën publike.
Ministria ka sqaruar se publikimi i konkurseve në portalin shtetëror për rekrutim elektronik më 28 prill dhe afati për aplikim deri më 28 maj janë pjesë e procedurave të rregullta administrative dhe nuk përbëjnë inicim të ri gjatë periudhës së kufizimeve ligjore.
Tutje, në reagim thuhet se interpretimet që këto procese përbëjnë shkelje të nenit 31 të Ligjit për Qeverinë janë “të qëllimshme dhe të pasakta”, pasi bien ndesh me kronologjinë zyrtare dhe përmbajtjen e dispozitave ligjore.
Ministria e Drejtësisë ka vlerësuar se përpjekjet për të ndërtuar “narrativa të paligjshmërisë” mbi procese të dokumentuara nuk i shërbejnë transparencës dhe besimit publik, por, sipas saj, përfaqësojnë instrumentalizim politik të çështjeve institucionale.
Në fund, ministria ka ritheksuar se të gjitha procedurat janë zhvilluar në mënyrë të hapur, transparente dhe në përputhje me ligjin, duke përgënjeshtruar çdo akuzë të ngritur nga ish-deputetja Bajrami./teve1.info/
