Në kuadër të planit për forcimin e administrimit të dokumentacionit institucional, është mbajtur një takim ndërinstitucional ku u diskutua për masat që synojnë përmirësimin e sistemit të menaxhimit dhe ruajtjes së dokumenteve.
Në takim morën pjesë Sekretari i Përgjithshëm i Ministrisë së Drejtësisë, Sekretari i Përgjithshëm i Ministrisë së Kulturës dhe Turizmit, Shefja e Stafit të Zëvendëskryeministres dhe Ministres së Drejtësisë, si dhe përfaqësues të Agjencisë Shtetërore të Arkivave të Kosovës (ASHAK).
Gjatë takimit u dakorduan hapat për nisjen e procesit të klasifikimit, sistemimit dhe shenjëzimit të dokumenteve, përcaktimit të afateve të ruajtjes dhe trajtimit të tyre deri në dorëzimin në arkiv.
Procesi parasheh edhe krijimin e hapësirave dhe kushteve të përshtatshme për ruajtjen fizike të dokumentacionit, në përputhje me standardet arkivore, si dhe digjitalizimin dhe menaxhimin e dokumenteve në formë elektronike.
Ministria e Drejtësisë, në bashkëpunim me institucionet përgjegjëse dhe ASHAK-un, pritet të vijojë zbatimin e këtyre masave në përputhje me legjislacionin në fuqi.
Sipas MD-së, qëllimi i këtij procesi është vendosja e standardeve të unifikuara në menaxhimin e dokumenteve dhe krijimi i një sistemi më të organizuar, të sigurt dhe të digjitalizuar të administrimit të dokumentacionit në institucionet publike./teve1.info/
