Ministri izraelit i Financave, Bezalel Smotrich, deklaroi se nuk u beson garancive të presidentit egjiptian Abdel Fattah al-Sisi se Egjipti nuk ka synime për të sulmuar Izraelin.
Duke folur për platformën izraelite Ali Express të cituar nga Anadolu, Smotrich paralajmëroi se Egjipti mund ta humbasë Gadishullin e Sinait në rast të një sulmi ndaj Izraelit.
“Nëse ata e kuptojnë se herën tjetër që sulmojnë, nuk do të ketë më Sinai, kjo është garancia”, tha ai.
Smotrich argumentoi se Izraeli duhet të përqendrohet te kapacitetet ushtarake të vendeve fqinje, jo te deklaratat e tyre politike.
Ai gjithashtu bëri thirrje për aneksimin e territoreve në jug të Libanit që aktualisht kontrollohen nga ushtria izraelite.
“Ne duhet ta aneksojmë territorin të paktën deri te vijat ku jemi pozicionuar sot”, deklaroi ai, duke paralajmëruar se forcat izraelite do të përparonin drejt Bejrutit në rast të një sulmi nga Hezbollahu.
Sipas të dhënave libaneze, sulmet izraelite që nga 2 marsi kanë vrarë mbi 4.300 persona, kanë plagosur më shumë se 12.400 të tjerë dhe kanë zhvendosur mbi një milion njerëz.
Smotrich kërkoi gjithashtu që Izraeli të marrë kontrollin e Rripit të Gazës dhe të nxisë largimin e rreth 2,4 milionë palestinezëve që jetojnë atje.
“Ne duhet t’i eliminojmë shpresat e tyre për të qëndruar”, tha ai, duke sugjeruar që nisma e zhvendosjes të paraqitet ndërkombëtarisht si zgjidhje për çështjen e refugjatëve.
“Nuk dua ta quaj nxitje të migrimit. Ndërkombëtarisht, do të ishte më mirë ta quanim zgjidhja përfundimtare e çështjes së refugjatëve dhe rehabilitimi i tyre”, u shpreh Smotrich.
Ofensiva izraelite në Gaza, e nisur në tetor 2023, ka shkaktuar mbi 74.000 viktima palestineze dhe më shumë se 175.000 të plagosur, sipas Ministrisë së Shëndetësisë në Gaza.
Deklaratat e Smotrich vijnë në prag të zgjedhjeve të përgjithshme në Izrael, të planifikuara për 27 tetor, në një kohë kur politika e sigurisë dhe synimet territoriale të vendit janë pjesë e debatit politik.
