Superliga e Kosovës në basketboll nuk ka të ndalur, ku në mesjavë do të kemi përsëri duele interesante.
Të mërkurën dhe të enjten do të zhvillohen nga dy takime me orare të njëjta, e këto duele i takojnë xhiros së 12-të të elitës së basketbollit kosovar.
Të mërkurën janë në program takime tejet interesante, ku dueli që spikat është ai mes Vëllaznimit dhe Rahovecit, skuadrave që do të mundohen të mbijetojnë këtë sezon në Superligë.
Të dy skuadrat janë përforcuar dhe kërkojnë fitore në këtë takim tejet interesant, që zhvillohet në palestrën “Shani Nushi”.
Dueli tjetër zhvillohet në palestrën “Karagaçi”, ku Peja do të jetë nikoqire e Sigal Prishtinës.
Si verdhezinjtë, po ashtu edhe bardhekaltrit renditen në pjesën e epërme të tabelës, me Pejën që është e dyta, ndërsa Prishtina e katërta.
Edhe takimet e së enjtes janë sfiduese, ku dueli më interesant pritet të jetë ai mes Golden Eagle Yllit dhe Bashkimit.
Ylli nuk po kalon formë aspak të mirë këtë edicion, ku zë vendin e shtatë në tabelë, apo të parafundit, ndërsa Bashkimi vazhdon të jetë lider i Superligës.
Dueli i fundit është ai mes Trepçës dhe Borës, që do të zhvillohet në palestrën “Minatori”.
Të gjitha takimet e xhiros së 12-të zhvillohen nga ora 18:45 dhe mund t’i ndiqni drejtpërdrejt në “Telkos”.
