Lionel Messi ka përcjellë një mesazh emocionues për tifozët e Argjentinës pas fitores 2:1 ndaj Anglisë, rezultat që i siguroi “Albicelestëve” një vend në finalen e Kupës së Botës, ku më 19 korrik do të përballen me Spanjën.
Kapiteni argjentinas ishte edhe njëherë vendimtar në suksesin e skuadrës së Lionel Scalonit, duke dhuruar dy asistime në gjysmëfinale dhe duke udhëhequr Argjentinën drejt finales së dytë radhazi në Kampionatin Botëror.
Pas ndeshjes, Messi falënderoi tifozët dhe i ftoi ata të vazhdojnë ta shijojnë rrugëtimin e kombëtares, duke përsëritur mesazhin që kishte dhënë edhe në Katar.
“Për tifozët them të njëjtën gjë që thashë në Katar: shijojeni. Kjo skuadër nuk do t’ju zhgënjejë kurrë”, deklaroi Messi.
39-vjeçari e cilësoi këtë Botëror si një nga më të jashtëzakonshmit që ka përjetuar, ndërsa theksoi se kualifikimi në një tjetër finale është një arritje e madhe.
“Ky Botëror ka qenë absolutisht i çmendur dhe arritja në një tjetër finale të Kupës së Botës është e pabesueshme”, u shpreh ai.
Messi veçoi edhe atmosferën e krijuar nga tifozët argjentinas, duke thënë se ndeshja ndaj Anglisë kishte një domethënie të veçantë që nga momenti i intonimit të himnit kombëtar.
“Edhe pse ishte një ndeshje futbolli, që nga momenti kur nisi himni kombëtar përjetuam diçka të veçantë. Kjo nuk ishte thjesht një fitore tjetër, populli argjentinas e dëshironte dëshpërimisht këtë fitore”, tha ylli i Argjentinës.
Me triumfin ndaj Anglisë, Argjentina siguroi finalen e madhe të Botërorit, ku të dielën, më 19 korrik, do të përballet me Spanjën në përpjekje për të mbrojtur titullin e kampionit të botës.
Messi synon të udhëheqë edhe një herë ekipin e tij drejt historisë, pasi vazhdon të jetë protagonisti kryesor i “Albiceleste”, këtë herë me dy asistime vendimtare në gjysmëfinale.
