Publicisti Kim Mehmeti ka folur për statusin e gjuhës shqipe në Maqedoninë e Veriut gjatë emisionit “Këndi i Kimit” në Tevë1. Ai ka sqaruar se zyrtarizimi i gjuhës nuk varet nga përqindja e popullsisë, por nga autoktonia e komunitetit.
“Nuk zyrtarizohet gjuha shqipe me ligj, gjuhët zyrtarizohen me Kushtetutë. Zyrtarizimi i gjuhës shqipe nuk lidhet me përqindje, lidhet me autoktoninë. Je popull autokton, edhe 1% të jesh, do të jesh gjuhë zyrtare”, ka thënë Mehmeti.
Ai komentoi edhe ish-presidentin maqedonas Stevo Pendarovski, të cilin e përshkroi si një nga figurat më të ndershme dhe objektive që ka pasur Maqedonia e Veriut.
“Ai ka qenë një ndër njerëzit më të ndershëm dhe më objektiv që ka pasur Maqedonia, edhe presidenti më i mirë që ka pasur ndonjëherë. Për shkak të këtij karakteri, nuk u kandidua nga partitë shqiptare, edhe pse ishte kandidati pro-shqiptar më i qartë. Edhe Lëvizja Vetëvendosje dhe kryeministri i Kosovës e mbështetën vizitën e tij në Prishtinë për të kërkuar mbështetje nga partitë shqiptare, por kjo nuk u përfill”, ka deklaruar Mehmeti.
Ai shtoi se Pendarovski ka qenë kandidati më pro-shqiptar që ka pasur Maqedonia, dhe votimi për presidentin ka pasur ndikim edhe te marrëdhëniet mes komuniteteve.
