Disa me mjete të rënda, e disa me varka.
Kjo është mënyra e vetme për t’i evakuuar këta banorë nga shtëpitë e tyre në shumë lagje të Mitrovicës.
Si shkak i reshjeve të mëdha të shiut, lumi Sitnica doli nga shtrati, dhe vendbanimet në afërsi të Parkut të Biznesit i bëri tërësisht të pabanueshme.
Banorëve në ndihmë u dolën edhe ekipet emergjente, si policia, zjarrfikësit dhe ekipet e kërkim-shpëtimit.
“Këtu në zonën “Amina” që quhet janë të përfshira disa shtëpi ku jemi duke e bërë evakuimin e banorëve këtu përreth. Sot kemi pasur më shumë vështirësi edhe për shkak të motit të ftoftë, që nga ora 02:00 deri më tani jemi duke evokuar banorët e kësaj ane. Që nga ora 02:00 e deri më tani janë diku rreth 40 familje”, thotë Burim Ibishi – komandat i zjarrfikësve në Mitrovicë.
Dikush u përkujdes edhe për kafshët.
Mirëpo, jo të gjithë pranuan që të largohen nga shtëpitë e përmbytura.
Për gjendjen shëndetësore të të vërshuare u përkujdesën ekipet mjekësore.
“Gjenda deri më tani është e mirë domethënë, gjithë ekipet janë në gatishmëri. QKMF i ka dy ekipe statike në emergjencë dhe për momentin është edhe një ekip që ka dal në teren me ju qëndruar afër”, thotë Sanije Klinaku – Limani – kryeshefe e QKMF-së.
Vërshime gjatë këtyre ditëve pati edhe në qytetet e tjera të Kosovës si në Drenas, Malishevë e Gjakovë.
