Sipas avokatit të Kadri Veseli, ekzistojnë prova nga procesverbalet që shërbimet e zbulimit serb kanë kërkuar që ta korruptojnë dëshminë para trupit gjykues
“S’e pranojmë pohimin që Serbia i ka dëshmitë dhe që nëse ka ndodhur një gjë e tillë është material që do të diskreditojë çështjen e Prokurorisë. Janë dhënë dëshmi që shërbimi sekret serb që nga niveli më i lartë ka marrë pjesë në praktika të ndryshme të kanosjes, kërcënimit, ryshfetit e individë të ndryshëm duke detyruar të nënshkruajnë dokumente që Prokuroria do t’i vendoste në tabelën e saj. Bashkëpunimi i ZPS-së me një kriminel lufte serb është shqetësues dhe të çon në përfundimin se është një problem themelor që duhet zgjidhur, dhe duhet zgjidhur tani”, tha Ben Emmerson, avokat i Veselit.
Në konferencën statusore ndaj katërshes së UÇK-së, mbrojtësit kërkuan që prokuroria t’i dorëzojë të gjitha materialet shfajësuese.
Mbrojtësi i Thaçit, ka theksuar nevojën që të dijnë sasinë e dokumenteve që bazohen në qarqet serbe, duke përmendur edhe rastin e kërcënimit të ish ambasadorit zviceran, Dick Marti.
“Qëndrimi i marrëdhënieve që ka ZPS me organet serbe duhet të jetë në të njëjtin nivel që ka me të tjerët. Ne duhet të dimë se cila është origjina e dokumenteve që nxjerr ZPS para trupit gjykues, duhem të dimë nëse vijnë nga shërbimi serb apo organet hetuese të Serbisë. Kanosja që i është bërë Martyt vjen nga shërbimet serbe për të penguar drejtësinë në këtë çështje’, tha Gregory Kehoe, avokat i Thaçit.
E Zyra e Prokurorit të Specializuar, ka bërë të ditur se planifikojnë t’i nxjerrin edhe 40 mijë materiale shfajësuese, numri i të cilëve deri më tani është 54 mijë.
Raporti i gazetares, Florijeta Dernjani.
