Këtë të premte, nxënësit e klasave të nënta iu nënshtruan Testit të Arritshmërisë.
Si në të tilla testime të mëhershme, telefonat iu mblodhën.
Por pavarësisht masave që shkollat morën, testi arriti sërish të qarkullojë në rrjete sociale.
Madje, këtë herë, nuk vonoi më shumë se dy minuta.
Një gjë e tillë po shihet shqetësuese.
“Fakti që testi në ora 10:02 del në rrjete sociale, kjo tregon seriozitetin e këtij procesi. Fajtor këtu nuk i kemi vetëm nxënësit, mund të jenë edhe faktorët e tjerë, është e dhimbshme si proces me u dëmtua gjithë ajo punë, gjithë ai angazhim qoftë prej Ministrisë e Drejtorisë së Arsimit i gjithë atyre që angazhohen”, tha drejtori i shkollës, “Emin Duraku”, Visar Osmani.
Megjithatë, Osmani thotë se në shkollën që ai udhëheq në kryeqytet, gjithçka shkoi në rregull.
“Si proces ka shkuar mirë, ka filluar me kohë dhe ka përfunduar në orarin e paraparë, pra çdo gjë ka shkuar sipas planifikimeve dhe nuk kam ndonjë shqetësim apo ndonjë vërejtje sa i përket qendrës tonë”, tha Osmani.
Në anën tjetër, sfida të tilla të kopjimit, vlerësohet se nxjerrin në pah organizimin jo të duhur.
“Ky është problem në organizim siç po shihet te Provimi shtetëror i Maturës, administratorët u caktuan drejtpërdrejtë nga Ministria, te Testi i Arritshmërisë është pak problem sepse administratorët vijnë nga Komunat dhe nuk janë nën kontroll qendror. Mirëpo, sido që të jetë, një organizim i mirë nuk do të duhet të lejonte që pyetjet e testit të dalin jashtë dhe të shpërndahen në rrjete sociale”, tha eksperti i arsimit, Dukagjin Popovci.
Më herët ishte kërkuar nga prindërit që ky test të anulohej i tëri.
Por sipas njohësit të arsimit, kjo nuk do ishte një zgjidhje e duhur.
“Heqjen e testeve nuk kisha thanë se shteti nuk ka shumë mundësi të mbledh informacion për gjendjen e sistemit të arsimit. Mirëpo, unë mendoj se duhet të përmirësohet menaxhimi i testit, nga ana tjetër të ngritet edhe vetëdija tekmësimdhënësit, te familjet në veçanti sepse është keq të thuhet por shpesh herë familjarët po bëhen bashkëpunëtorë, në këtë shpërndarje, kopjim”, tha ai.
Në mbarë Kosovën, Testit të Arritshmërisë iu nënshtruan rreth 23 mijë nxënës.
