Kryesia e Lidhjes Demokratike të Kosovës është mbledhur të martën pas arritjes së marrëveshjes për kandidatin konsensual për president me Lëvizjen Vetëvendosje, ku është propozuar Bekim Sjediu.
Para mbledhjes, dy anëtarët e kryesisë të kësaj partie, Shkëmb Manaj edhe Jehona Lushaku janë shprehur optimistë se kandidatura e Sejdiut do të përkrahet nga gjitha organet e partisë, por edhe deputetët e të gjitha partive.
Por, deputeti i LDK-së, Avdullah Hoti të hënën ka thënë se nuk do të ketë votë për Sejdiun.
“E kam dhënë edhe dje qëndrimin, mendoj që Bekim Sejdiu është figura e duhur për president të Republikës. Ky qëndrim për kandidat konsensual për president të Republikës ka ndodhur pas mbledhjes së grupit parlamentar javën e kaluar, dhe jam i bindur që edhe sot Kryesia Qendrore e Lidhjes Demokratike të Kosovës, por edhe të gjitha organet e Lidhjes Demokratike të Kosovës do të jenë për kandidaturën e zotit Bekim Sejdiu për president të Republikës”, ka deklaruar Manaj.
Ndërsa Lushaku ka thënë se emri i propozuar po diskutohet në organet e partisë, duke theksuar se kryetari i LDK-së ka qenë i autorizuar për negociata.
Megjithatë, ajo ka thënë se kandidati për president do të hidhet në votim për të gjithë deputetët pa dallim partie, duke theksuar se Sejdiu është një figurë e duhur për president të vendit.
