Për vrasjen që ndodhi para 19 vitesh, sot u shpall aktgjykimi.
Familjarë e persona të afërt të Ilir Abdullahu i njohur si “Liza” dhe Rrahim Abdullahu i njohur si “Rrumqi” pasdite u mblodhën në këtë sallë në Gjykatën Themelore më Prishtinë.
Ata po prisnin vendimi e gjykatës për dy të akuzuarit të cilët dyshohet se morën pjesë në vrasjen e policit të Njësive Speciale, Triumf Riza.
E me pranga në duar këtu u soll Ilir Abdullahu, kurse i pranishëm nuk ishte edhe i bashkakuzuari i tij, Rrahim Abdullahu.
Gjykata i ka gjetur fajtor Lizën e Rumqin dhe i ka dënuar për vrasje të rëndë në bashkëkryerje.
“Të akuzuarin Ilir Abdullahu i shqipton dënimin në kohëzgjatje 18 vjetëve e të cilin obligohet ta mbaj nga data e plotfuqishmërisë së Gjykimit. Të akuzuarin, Rahim Abdullahu i shqipton dënim prej 18 viteve”, tha gjykatësi Avni Syla.
Gjykata vendosi edhe masën e paraburgimit për dy të akuzuarit.
“Të akuzuarit Ilir Abdullahut, Gjykata ia vazhdon paraburgimit deri në plotfuqishmëri të dënimit por jo më gjatë se dënimi i shqiptuar, kurse të akuzuarit Rahim Abudllahut, Gjykata i cakton masën e paraburgimit deri në plotfuqishmëri të dënimit por jo më gjatë se dënimi i shqiptuar”, deklaroi Syla.
I akuzuari kryesor në këtë vrasje, është Enver Sekiraqa, i cili ndodhet në arrati.
Për t’u arratisur, Sekiraqa e kishte shfrytëzuar vendimin e Gjykatës Themelore të Prishtinës, trupi gjykues i së cilës pasi e dënoi me 25 vite burgim, nuk e dërgoi atë në paraburgim, por e la të lirë deri në plotfuqishmërinë e vendimit.
Që nga ajo ditë, Enver Sekiraqa është i pakapshëm nga organet e rendit.






