Skuadra e Malishevës po e kërkon suksesin historik ndaj Hibernianit dhe atë në Skoci, sot në mbrëmje.
Pas fitores historike 2:0 në ndeshjen e parë javën e shkuar, Malisheva prej orës 21:00 luan ndeshjen e kthimit të raundit të dytë kualifikues në Ligën e Konferencës.
Misioni i Malishevës nuk do të jetë aspak i lehtë, duke pasur parasysh se skuadra skoceze do ta ketë përkrahjen e madhe të tifozëve në këtë duel të rëndësishëm.
Megjithatë, te Malisheva ka optimizëm se mund t’ia dalin mbanë dhe të kualifikohen në raundin e tretë kualifikues për herë të parë në histori të klubit.
Malisheva po garon për herën e tretë në Evropë, ku në dy sezonet e kaluara u ndal në raundin e parë kualifikues të Ligës së Konferencës.
Këtë herë, Malisheva e kaloi këtë raund, në të cilin e eliminoi Vllazninë e Shkodrës duke e mposhtur me rezultatin e përgjithshëm 6:2 pas dy ndeshjeve të luajtura.
