Skuadra e Malishevës është e vendosur ta shkruaj edhe më tej historinë dhe atë duke avancuar në raundin e dytë kualifikues të Ligës së Konferencës.
Malisheva, tashmë e ka shkruar historinë pasi javën e shkuar debutoi me fitore në ndeshjen e parë zyrtare në garat evropiane.
Javën e shkuar në Podujevë, Malisheva e mposhti 1:0 Buduqnostin e Podgoricës në kuadër të raundit të parë kualifikues të Ligës së Konferencës kurse sot në mbrëmje luan ndeshjen e kthimit.
Ky takim nis në orën 21:00 dhe luhet në stadiumin “Podgorica City”, në të cilin Malisheva synon kualifikimin në rrethin e dytë kualifikues të kësaj gare.
Malisheva e ka në favor rezultatin e ndeshjes së parë dhe mjafton ta evitoi humbjen në përballjen e dytë, ndonëse nuk do të jetë lehtë për shkak se Buduqnosti luan në shtëpi.
Skuadra e Superligës së Kosovës, të mërkurën ka mbyllur seancën e fundit stërvitore para ndeshjes dhe pritet të jetë e kompletuar.
Sigurisht, shpresat më të mëdha për këtë përballje, Malisheva i ka te sulmuesit Drilon Hazrollaj e Altin Aliu, por edhe te mesfushori Etnik Brruti.
Ishte pikërisht Brruti, ai që në ndeshjen e parë ndaj Buduqnostit shënoi supergol për t’ia siguruar fitoren Malishevës.
Për Malishevën, kjo është hera e parë që po paraqitet në garat e UEFA-s, pasi sezonin e shkuar përfundoi e katërta në Superligën e Kosovës.
