Ambasadori i Shqipërisë në Kosovë, Petrit Malaj, ka bërë të ditur se ditëve të fundit është shtuar ndjeshëm numri i qytetarëve nga Shqipëria që po udhëtojnë drejt Kosovës, kryesisht për arsye pune dhe turizmi.
Sipas tij, shumë prej tyre po e shfrytëzojnë sezonin dimëror për të shijuar peizazhet malore dhe për të praktikuar skijimin në zonat turistike të Kosovës.
Duke e vlerësuar pozitivisht këtë fluks vizitorësh, Malaj njëkohësisht ka apeluar për kujdes të shtuar gjatë udhëtimeve, duke theksuar rëndësinë e përgatitjes së mirë dhe pajisjes së automjeteve sipas kushteve dimërore.
Gjatë këtij sezoni është e domosdoshme që automjetet të jenë të pajisura me goma dimri dhe zinxhirë. Shumë prej jush udhëtoni me familje apo në grupe dhe kurrsesi nuk duhet të rrezikoni. Rreziku nuk është vetëm për veten dhe familjet tuaja, por edhe për të tjerët që qarkullojnë në rrugë. Shpeshherë, për shkak të mungesës së pajisjeve të duhura, mbetja në rrugë pengon edhe qarkullimin e të tjerëve. Prandaj, bëni kujdes, planifikoni udhëtimin me përgjegjësi dhe shijoni Kosovën në mënyrë të sigurt”, ka shkruar ai.
