Në gjykimin ndaj Naim Murselit, Granit Plavës dhe Kushtrim Kokallës, dëshmoi sot Aurel Pajaziti, personi që kishte lëshuar me qira veturën me të cilën dyshohet se është kryer vrasja e Liridona Ademajt.
Pajaziti konfirmoi para trupit gjykues se veturën ia kishte dhënë me qira të pandehurit Granit Plava më 27 nëntor 2023.
“Vetura i është dhënë me qira Granit Plavës. E ka pasë në posedim për dy ditë, deri më 29 nëntor. E ka kthyer rreth orës 14:00 dhe pas një ore e ka marrë sërish,” – deklaroi dëshmitari.
Ai sqaroi se Plava kishte ardhur për ta marrë veturën në fshat, tek shtëpia e tij.
“Ka ardhur me një person tjetër, që nuk e njihja. Ishin me një veturë Range Rover, si ngjyrë hiri,” – tha Pajaziti.
I pyetur nga prokurorja Javorka Perlinçeviq se kush ishte duke drejtuar makinën në momentin kur kishin arritur në fshat, dëshmitari u përgjigj:
“Kur kanë ardhë, Range Roverin e voziste Graniti. Por kur e morën veturën time me qira, pastaj doli që personi tjetër po voziste.”
Megjithatë, identiteti i personit që e shoqëronte Plavën mbeti i panjohur për dëshmitarin.
“Edhe tani është person i panjohur për mua,” – u shpreh Pajaziti.
Kjo dëshmi shihet si një pjesë e rëndësishme e zbardhjes së detajeve rreth mënyrës se si është siguruar automjeti që dyshohet se u përdor për të realizuar krimin.
