Drejtori i Global Crisis Group, Ilir Kulla, ka komentuar ndikimin që mund të kenë në Kosovë protestat e studentëve kundër Qeverisë së Shqipërisë, duke theksuar nevojën për më shumë vëmendje ndaj dallimeve sociale dhe rrezikut të përçarjeve politike.
Në emisionin “Matrix” në Tëvë1, Kulla ka thënë se Kosova duhet të nxjerrë mësime nga zhvillimet në Shqipëri dhe të përqendrohet më shumë te qytetarët në fshatra dhe në zonat periferike, ku, sipas tij, janë shfaqur dallime sociale mes njerëzve.
Ai ka paralajmëruar gjithashtu për rrezikun që fryma e konfliktit në politikë të përhapet te qytetarët, duke theksuar se përçarjet mund të kenë pasoja në shoqëri.
“E para, duhet të ketë kujdes se edhe në Kosovë kanë filluar të shfaqen këto diferenca sociale mes njerëzve që kanë dhe atyre që nuk kanë. Pra, Kosova duhet të hedhë më shumë vëmendje drejt fshatit dhe periferisë, që të mos e përsërisë gabimin e Shqipërisë”, ka deklaruar Kulla.
Ai ka shtuar se Kosova duhet të jetë e kujdesshme edhe ndaj polarizimit politik dhe ndikimit të tij në marrëdhëniet mes qytetarëve.
“E dyta, të ketë kujdes nga diferencat sociale dhe fryma e konfliktit që përcjell politika te njerëzit, sepse pastaj vjen dita dhe i paguajnë, siç po i paguajnë në Shqipëri”, është shprehur ai.
Sipas Kullës, përçarja mes shqiptarëve në Shqipëri përbën një zhvillim shqetësues në rrafshin politik dhe social.
“Sigurisht, në planin politik kjo nuk është një gjë e mirë, sepse kalon një periudhë ku shqiptarët në Shqipëri janë të përçarë me njëri-tjetrin. Kjo është situata politike dhe sociale që ne lexojmë”, ka përfunduar Kulla./teve1.info/
