Në kuadër të programit “Kosova, shtet i xhudos”, në palestrën buzë lumit Ibër, u mbajt stërvitje demonstruese e xhudos. Rreth 1000 fëmijë thirrën vazhdimisht “Majlinda, Majlinda”. Prezent ishte edhe kryeministri Albin Kurti, që foli për përfshirjen e xhudos në shkolla dhe për rëndësinë e sukseseve të xhudistëve kosovarë
Për ta përcjellë demonstrimin e saj, në palestrën buzë lumit Ibër ishte kryeministri i Kosovës, Albin Kurti. Të pranishëm ishin edhe rreth 1000 fëmijë e të rinj.
Emri i Majlindës u thirr shumë herë, sidomos teksa ajo bënte lëvizje atraktive të xhudos.
Ajo dhe kryeministri Kurti hynë bashkë në palestër, ndërsa morën duartrokitje nga fëmijët e shumtë.
Majlindën e shoqëroi kryetrajneri i Kosovës në xhudo, Driton Kuka. Ai tha se nxënësit e tij nuk dinë të flasin për urrejtjen në sport.
“Kampionia olimpike me demonstrimin dhe mjeshtërinë e saj do të tregojë se sporti është për të përçuar mesazhe paqeje e jo si disa sportistë të tjerë”, ka thënë Kuka.
Ai iu referua provokimeve që iu bënë Kosovës nga tenisti serb, Novak Gjokoviq.
E kryeministri Kurti foli për programin “Kosova, shtet i xhudos”, në kuadër të të cilit edhe u mbajt demonstrimi në Mitrovicë. Ai treguar se xhudoja do të mësohet në shkolla prej vitit të ardhshëm shkollor.
“Të dashur nxënës, rrugëtimi i Majlindës është shembull të cilin të gjithë ju duhet ta synoni dhe ta ndiqni, në cilindo angazhim në jetë. Të them të drejtën po mundohem ta ndjeki edhe unë personalisht në detyrën që kam”, ka thënë Kurti.
Pasi e përfundoi demonstrimin, Majlinda falënderoi kryeministrin për përkrahjen e xhudos dhe sportit në përgjithësi, tek ia dhuroi një brez të zi, si dhe librin kushtuar asaj.
Krahas Majlindës, xhudo demonstruan edhe anëtarët e klubit “Trepça” e po ashtu xhudiste të tjera reprezentuese. Majlinda mbeti gjatë në “Minatori”. Shumë fëmijë bërë fotografi dhe kërkuan të bisedojnë me Majlindën, që tashmë punon si trajnere e xhudos.
