Lëvizja Vetëvendosje edhe në këto zgjedhje, njëjtë si më 9 shkurt nuk do të garojë e vetme.
Ajo ka nënshkruar koalicion me Listën Guxo, Alternativën dhe me Partinë Shqiptare Demokristijane të Kosovës me të cilat në zgjedhjet e fundit shënoi fitore.
Deputetja e këtij koalicioni nga “Guxo”, Jeta Statovci thotë se çështjet parimore i kanë bashkuar ata me LVV-në.
“Jemi fokusuar më shumë te ajo e përbashkëta sesa çështja e formaliteteve të cilat e bëjnë ndarjen andaj varësisht shpesh edhe rrethanave që kemi qenë kemi operaur në një listë të përbashkët mirëpo duke ruajtur dhe respektuar diferencën e njëri tjetrit si subjekte të ndryshme politike. Kjo asnjëherë nuk ka qenë pengesë, prapë është krijuar një sinkron shumë i shëndoshë në kuadër të asaj që e kemi besuar që i sjellë vlerë vendit dhe shoqërisë”, tha Statovci.
Por, a do të hyjë ky subjekt politik i vetëm në zgjedhjet tjera, kurdo që ato mbahen?
“Jemi munduar të sjellim një vlerë të re dhe një qasje të re karshi aspekteve politike, kjo deri më tash ka dhënë legjitimitetin e saj qytetar dhe padyshim tentojmë të rritemi dhe të kemi prezencë edhe më të madhe në kaudër të bashkëpunimit që kemi. Aktualisht funksionojmë në një sinkron të mirë me LVV-në, pjesa tjetër varësisht edhe prej rrethanave dhe vlerësimeve që i bëjmë dhe ne të brendshme se cila është më e mira për tërësinë në përgjithësi”, shprehet ajo.
E partitë tjera ish-opozitare kanë vendosur të garojnë të vetme, duke mos lidhur koalicion me subjekte politike.
Tëvë1 përmes burimeve ka mësuar se kreu i Nismës Socialdemokrate, Fatmir Limaj është në bisedime me Partinë Demokratike të Kosovës që t’i bashkohet listës së tyre, mirëpo ende nuk ka diçka zyrtare.
Megjithatë hyrja në garë si të vetme, AAK-së e NISMA-s mund t’u shkaktoj rënie të përqindjes.
“A do të ketë rënie të të dyja partitë, do të ketë rënie sepse PDK-ja, LDK-ja, LVV-ja mëtojnë të rriten, dhe këto rritje duhet t’i kushtojnë dikujt në vota dhe elektroat. Por në anën tjetër edhe elektorati, publiku i cili do të votojnë në këto zgjedhje do të bëjnë hapa më strategjikë të zgjedhë parti të cilat definitivisht hyjnë në qeveri”, shprehet Latif Mustafa, studiues i filozofisë politike.
Në legjislaturën e fundit, ishin gjithsej pesë grupe parlamentare.
