Deputeti i Partisë Demokratike të Kosovës, Mërgim Lushtaku thotë se nuk është çuditur fare nga deklaratat të cilat sot i ka thënë Haki Abazi dhe lidhur me shkarkimin e tij nga pozita e kryesuesit të Komisionit për Punë të Jashtme si dhe nga Komisioni për Stabilizim Asociim.
“Mua nuk më ka çuditur fare kjo çështje, besoj kanë qenë diskutime publike pjesa ku Haki Abazi kishte një bashkëpunim me Vetëvendosjen qysh nga Kurti II dhe e kemi pa që kemi një largim nga Vetëvendosja”, tha ai në emisionin “Info Nata” në Tëvë1.
Lushtaku foli edhe për siç i quan ai elemente të tradhtisë së Abazit në kohën sa ka qenë zëvendëskryeministër.
“Unë personalisht kam pasur shumë debate me ish-zëvendëskryeministrin, Haki Abazi, në atë kohë, sa ka qenë shkurt, aq sa ka qenë ka krijuar debat, sepse me të vërtetë 20 takime shumë misterioze dhe shumë serioze dhe ndoshta me elemente të tradhtisë ka pasur në atë kohë kur zoti Haki Abazi si zëvendëskryeministër është takuar”, tha Lushtaku.
Lidhur me këto elemente të tradhtisë ai është përgjigjur duke thënë se e ka pyetur se si zëvendëskryeministër me kënd është takuar në disa raste, por se Abazi nuk i është përgjigjur asnjëherë.
