Kryetari i LDK’së, Lumir Abdixhiku, pas mbledhjes së Kryesisë së LDK’së, tha se janë dakorduar në parti për të garuar bashkë në zgjedhje me ish-Presidenten Vjosa Osmani.
Ai tha se kjo do të formalizohet në mbledhjen e Këshillit të Përgjithshëm, të shtunën.
“Votuam dhe u dakorduam që të formalizojmë me Vjosa Osmanin garimin e përbashkët në zgjedhje. Kishte dakordim për idenë e bashkimit, për garim të përbashkët, kishte dakordim për shumë gjëra që i kemi diskutuar. Në mbledhjen e Këshillit të Përgjithshëm do t’i formalizojmë të gjitha”, tha Abdixhiku para gazetarëve.
Ai mohoi se Osmani ka vendosur kushte.
“Asnjë kusht me Vjosën s’kemi pas”, deklaroi Abdixhiku.
I pyetur nëse Osmani do të jetë bartëse e listës, ai tha se për të renditja s’është problem.
“Renditja në listë për mua s’ka fare rëndësi, përderisa gjejmë një modalitet që funskionon”, tha Abdixhiku.
Sipas Abdixhikut, Osmani është kandidatja më e duhur për Presidente të Kosovës.
