Hapat e parë drejt një fillimi të ri i nisën këtë të martë.
Ky 1 shtator, shumë fëmijë i gjeti në oborret e shkollës për herë të parë.
E mbushur me njomakë, qe edhe hapësira e shkollës “Ismail Qemali” në kryeqytet.
Për disa nxënës, kjo ditë u pa si një mundësi për të takuar shokë të rinj.
“Po ndjehem mirë se ka me taku shokë të rinj”, u shpreh një nxënës.
E të tjerë, menduan të sjellin edhe disa dhurata.
“Ka me ju dhanë shokëve edhe shoqeve bonbona”, u shpreh edhe nje nxënës.
“Mami ma ka ble me shpërnda”, ka thënë edhe nxënësi tjetër
“Për mësuesen edhe për vete me lanë këtë në bankë, në klasë”, ka theksuar një nxënës tjetër.
Mall kishin edhe nxënës që tashmë ka vite që kanë nisur shkollën.
“Ju dua shumë”, tha një nxënëse.
Por fillimi i vitit shkollor nuk është emocion vetëm për fëmijët, por edhe për prindërit.
“Është një ndjenjë shumë e veçantë, pasi që në shoqërinë tonë kosovare emancipimi i femrave ka një rol të rëndësishëm në shoqëri. Si prind i dy vajzave jam shumë i lumtur që e kam mundësinë me i shkollu, me i eduku, që nesër me qenë shembull për së miri”, ka thënë një prind.
“S’ka ndjenjë më të mirë, kënaqësi është, veç po më dhimbet se tash gajle sa të ka jetë nuk kanë me ju heq më”, u shpreh një gjysh.
Se si shkoi kjo ditë e parë e fillimvitit shkollor, tregoi drejtoresha e shkollës “Ismail Qemali”.
“Procesi ka filluar mirë. Në orën 07:15 nxënësit kanë qenë në oborr të shkollës, të gjithë kujdestarët kanë qenë të pranishëm dhe i kanë prit nxënësit. Të gjithë nxënësit kanë qenë në proces mësimor, procesi ka filluar 07:30- 12:35 veçse përfundoi. Tani po vazhdojmë me ndërrimin e dytë e gjithçka është në rregull”, ka theksuar drejtoresha e SHFMU “Ismail Qemali”.
Nga Ministria e Arsimit kanë njoftuar se në disa shkolla mund të ketë vonesa të vogla për shkak të renovimeve, por kjo nuk e ndryshon datën zyrtare të fillimit të vitit të ri shkollor.
