Punën në teren, disa ekipe te kontrollit të KEDS-it e filluan që në orët e hershme të mëngjesit.
Ata po shoqëroheshin edhe nga Njësia Speciale e Policisë së Kosovës.
Qëllimi i tyre ishte inspektimi i bizneseve të gastronomisë që dyshohet se po shfrytëzojnë energjinë elektrike në mënyrë të paligjshme në regjionin e Ferizajt.
E si destinacion të parë kishin një restaurant në fshatin Jezerc.
Por për dallim nga herët e kaluara ku ky biznes ishte gjobitur dy herë, kësaj radhe nuk u ndëshkua.
E dënime financiare nuk pati as për disa restaurante në qytetin e Shtimes.
Duke vazhduar më pas edhe në një pjesë të Brezovicës.
Detaje rreth këtyre aksioneve dha zëdhënësi i Kompanisë për Distribuimin e Energjisë Elektrike, Lulzim Krasniqi.
“Ishim dëshmitarë në tetë kontrolle, në tetë biznese për të cilat paraprakisht dyshohej që po e keqpërdornin energjinë elektrike. Megjithatë në asnjërin rast nuk hasëm në keqpërdorim të energjisë elektrike, çka në një anë është lajm i mirë sepse konsumatorët tanë veç se janë vetëdijesuar se keqpërdorimi i energjisë elektrike është i papranueshëm”, ka thënë Krasniqi.
Tutje, Krasniqi tregoi se kontrolle të tilla bëhen në baza ditore në mbarë Kosovën.
“Janë diku rreth 50 ekipe të ndara gjithë andej të cilat mesatarisht realizojnë 400-450 kontrolle prej të cilave diku rreth 20-25 në baza ditore dalin të jenë keqpërdorime të energjisë elektrike. Vetëm vitin e kaluar janë realizuar afro 100 mijë kontrolle prej të cilave diku 5300 kanë rezultuar të jenë keqpërdorime”, thotë ai.
Në rast të keqpërdorimeve, nga KEDS treguan se çfarë ndodh me këta persona.
“Në rastet kur një biznes kapet duke keq përdor energjinë elektrike atëherë varësisht prej paisjeve të cilat janë kapur në atë moment duke e keqpërdorë energjinë elektrike nëpërmjet tyre, llogaritet edhe nga orari i punës që ai biznes ka sa ditë në javë dhe kështu bëhet llogari deri në një vit e për konsumatorin shtëpiak është deri në gjashtë muaj”, ka thënë ai.
Vjedhja e energjisë elektrike dënohet me gjobë e deri në 3 vite burgim për shkelësit e ligjit.
